काठमाडौँ । अमेरिकी राष्ट्रपति डोनाल्ड ट्रम्पले लगाएको ५० प्रतिशत करका कारण भारतबाट अमेरिका निर्यात हुने करिब ७० प्रतिशत सामान प्रभावित भएका छन्। इन्डियन काउन्सिल फर रिसर्च अन इन्टरनेसनल इकोनोमिक रिलेसन्स (आईसीआरआईईआर) को प्रतिवेदनअनुसार यसले करिब ६०.८५ अर्ब डलर बराबरको भारतीय निर्यातमा असर पारेको छ। प्रतिवेदनले यसको सबैभन्दा ठूलो असर कपडा, रत्न तथा आभूषण, अटो पार्ट्स र कृषि उत्पादन जस्ता श्रम-गहन क्षेत्रमा पर्ने औंल्याएको छ। यी क्षेत्रहरूले बंगलादेश, भियतनाम र थाइल्याण्डजस्ता प्रतिस्पर्धी मुलुकहरूको तुलनामा ठूलो भन्सार शुल्कको सामना गर्नुपर्नेछ, जसले अमेरिकी बजारमा भारतको प्रतिस्पर्धात्मक क्षमतालाई कमजोर बनाउनेछ।
राष्ट्रपति ट्रम्पले सुरुमा २५ प्रतिशत कर घोषणा गरे पनि भारतले रुसी तेलको आयात जारी राखेपछि थप २५ प्रतिशत कर लगाइएको हो। यद्यपि, यो नयाँ कर व्यवस्थाले औषधि, ऊर्जा उत्पादन, महत्वपूर्ण खनिज र सेमिकन्डक्टर जस्ता क्षेत्रलाई भने समेटेको छैन।
भारत र अमेरिकाबीच अन्तरिम व्यापार सम्झौताका लागि वार्ता भइरहे पनि कृषि र दुग्ध क्षेत्र खोल्नुपर्ने अमेरिकी मागमा भारतको असहमतिले प्रगति हुन सकेको छैन। यी दुई देशले २०२५ सम्ममा वृहत् द्विपक्षीय व्यापार सम्झौता गर्ने लक्ष्य राखेका छन्।
