दिवंगत चार स्रष्टाका कृति एकसाथ लोकार्पण, कुन-कुन हुन् कृति?

२०८० पुष २६, बिहीबार १७:२१ ,प्रकाशित
अनुमानित पढ्ने समय : < 1 मिनेट

काठमाडौं । विभिन्न क्षेत्रमा योगदान पुर्याएका दिंवगत चार स्रष्टाका कृति बिहीबार एक समारोहबीच लोकार्पण गरिएको छ । वानीरा फाउण्डेसनका संरक्षक ई.शंकर गिरीले डा.ध्रुव शर्मा मुडभरीको आत्मकथा ‘लुकेको वृतान्त,’ ‘प्रेमा शाह,’ ‘राजनारायण प्रधान’ र ‘विरह’को एकसाथ लोकार्पण गरेका हुन् ।

समारोहमा नई प्रकाशनका संस्थापक नरेन्द्रराज प्रसाईंले दिवंगत स्रष्टाहरुको योगदानलाई जीवन्त राख्नका लागि कृति प्रकाशन गरिएको जानकारी दिए । लोकार्पित कृतिहरुमध्ये ध्रुव शर्मा मुडभरी आफैंले लेखेको ‘लुकेको वृतान्त’ उनका छोरा डा.अनिषको अगुवाइमा प्रकाशनमा आएको हो । ‘बुबाले करिब ५० वर्ष स्वास्थ्य क्षेत्रको सेवामा बिताउनुभयो । कोरोनाका कारण उहाँको देहावसान भयो । उहाँको योगदानलाई अमर राख्ने जमर्को गरेका हौं,’ डा.अनिषले भने ।

त्यस्तै बिहीबार नै लोकार्पण भएको प्रेमा शाहको जीवनीलाई अणुराज जोशीले अंग्रेजीमा रुपान्तरण गरेका हुन् । भारतीय नेपाली प्राज्ञ राजनारायण प्रधानको जीवनीकृतिलाई भने नरेन्द्रराज प्रसाईले लेखेका हुन् । त्यस्तै शिक्षा, साहित्य र समाजसेवाका क्षेत्रमा सक्रिय नारायणप्रसाद मिश्रको ‘विरह’ नई प्रकाशनले प्रकाशन गरेको हो ।

लोकार्पण समारोहमा फाउण्डेसनकी अध्यक्ष इन्दिरा प्रसाईले सन्तानहरु असल भएनन् भने अग्रजका कृति हराउने गरेको उल्लेख गर्दै ध्रुव शर्माको योगदानलाई जीवन्त राख्न डा.अनिष र मीना मुडभरीले गरेको कर्मलाई प्रशंसा गरिन् । सो अवसरमा वानीरा गिरीको सालिकमा माल्यार्पण पनि गरिएको थियो ।

प्रतिक्रिया दिनुहोस

सम्बन्धित समाचार

ताजा समाचार

लोकप्रिय