खोटाङमा बन्दकर्ता सडकमा, बिहानैदेखि यातायातका साधन ठप्प

२०७९ फाल्गुन २८, आईतवार ०६:१६ ,प्रकाशित
अनुमानित पढ्ने समय : 2 मिनेट

खोटाङ। प्रदेश १ को नाम ‘कोशी’ राखिएको विरोधमा आह्वान गरिएको बन्दका कारण खोटाङमा यातायातका साधन ठप्प बनेको छ । फागुन १७ गते प्रदेशको नाम ‘कोशी’ राखिएकोमा भर्त्सना गर्दै जनता समाजवादी पार्टी नेपाल, नेपाल आदिवासी जनजाति महासङ्घ जिल्ला समन्वय परिषद्, किरात राई यायोक्खा लगायतको सहकार्यमा आइतबार जिल्लाभर बन्द आह्वान गरिएको हो ।

पहिचानको आधारमा नामकरण गराउनका लागि दबाब सिर्जना गर्न गठित प्रदेश १ पुनः नामकरण संयुक्त सङ्घर्ष समितिको आह्वानमा जिल्लामा बन्द गरिएको जसपाका प्रदेश समिति सदस्य नेता नविन राईले बताए । संयुक्त बन्दका कारण जिल्लाबाट छुट्ने छोटो तथा लामो दूरीको सवारी साधन चल्न पाएका छैनन् । बन्दकर्ताले मोटरसाइकल समेत नियन्त्रणमा लिएर पार्किङ गराइरहेका छन् । सवारी साधन चल्न नदिन बन्दकर्ता बिहान साढे तीन बजेदेखि दिक्तेलको किरात चोकका सडकमा पुगेका थिए ।

बन्दकर्ता दिक्तेलको किरात चोक र अल्छेढुंगास्थित मध्य पहाडी लोकमार्गमा बसेर सवारी आवागमनमा रोक लगाइरहेका छन् । यातायात ठप्प हुँदा यात्रु भने मारमा परेका छन् । बन्दकर्ताले दिक्तेलबजारका पसल समेत बन्द गराएका छन् । बजार बन्द गराउन बन्दकर्ताको एक टोली खटिएका थिए । दिक्तेल बजार र आसपासका शैक्षिक संस्थामा पनि बन्दको प्रभाव परेको छ । दिक्तेल बाहिरका शैक्षिक संस्थामा भने आंशिक प्रभाव परेको छ । साबिकको सदरमुकाम दिक्तेलको तुलनामा अन्य ठाउँमा बन्दको प्रभाव कम देखिएको छ ।

प्रदेशको नामकरण सच्याउन र पुनः नामाकरणको मागमा पहिचान पक्षधर पार्टी तथा जातीय संघ संगठनले बन्द आव्हान गरेका हुन् । इतिहास, भूगोल, सभ्यता र संस्कृतिको आधारमा प्रदेशको नामकरण गर्नका लागि दबाब सिर्जना गर्न बन्द आव्हान गरिएको किरात राई यायोक्खा खोटाङका अध्यक्ष युगसन किरातले बताए ।

प्रदेशको पुनः नामाकरणका सन्दर्भमा खोटाङमा जनता समाजवादी पार्टी नेपाल, नेपाल आदिवासी जनजाति महासङ्घ जिल्ला समन्वय परिषद्, किरात राई यायोक्खा, किरात सेवा समाज, नेपाल जनजाति युवा सङ्घ, नेपाल तामाङ घेदुङ सङ्घ, नेवा देयःदवु, नेपाल तमु छ्योज्धी, नेपाल शेर्पा सङ्घ, नेपाल मगर सङ्घ, नेपाल भुजेल सेवा समाज, नेपाल माझी सेवा समाज, किरात चाम्लिङ राई खाम्वातिम, किरात साम्पाङ राई जुम्लेखा र किरात राई फन्सिकिमले संयुक्त सङ्घर्ष थालेका छन् ।

प्रतिक्रिया दिनुहोस

सम्बन्धित समाचार